Speels - Elle Roux

Elle Roux ken die verskille van die lewe. Dié tussen liefde en seks, dié tussen vashou en vasgehou wees. En sy is aan die regte kant van veertig vir 'n vrou wat meer wil weet as net die verskille tussen mans wat amper lekker is en mans wat amper genoegsaam is. 

Geïnspireer deur 'n oopkop dominee, word sy 'n entoesiastiese student aan die Universiteit van Sensualiteit. Sy slaag met hoogste lof in die kursus vir mans ontmoet via moderne kommunikasiemiddels. Sy looi haar onderste chakra met die hulp van 'n Namibiese plesierdier. Sy bevorder haar hand tot adjudant. Sy raak intiem bevriend met die fraaiste vibrator, maar mis iemand wat agterna in haar ore kan fluister. Sy leer Afrikaanse minnaars in alle skakerings ken. 'n Buitelandse vriendin masseer haar byna in 'n avontuurlike lewensverandering in, maar sy bly hunker na mans wat die seks én intimiteit ken. Want Elle is vertroud met een groot lewenswaarheid: Mans is eienaardige wesens. 

In Speels beskryf Elle Roux haar ompad na die liefde op ’n onvergeetlike manier. Eens was sy jonk en roekeloos genoeg om haar kop gereeld te stamp. Ná hierdie spulse lewenskursus word sy wys en leer ons die groot les van die sensuele vrou se lewe: Laat ander hul koppe stamp, sorg jy dat jy weet wat jy regtig wil hê, en kry dit. 

Speels is 'n vrolike boek – met Elle Roux aan die woord kan dit nie anders nie!

- Kerneels Breytenbach