Skadujagter - Dihanna Taute

"Jy moet weet, hier's duidelik 'n paar skroewe los. Die enigste ding hier wat nie los is nie, is die skool se girls. And believe me, I've tried."

Laatnag skrik ek wakker. Natgesweet in my bed, my hele lyf aan die brand. Iemand is besig om teen my kamervenster te hamer. Shane. Ek herken die skaduwee wat die straatlig deur die kantgordyn gooi. Hoe de hel het hy geweet ek is hier?

"Haal asem, Heibrandt," hoor ek hom deur die glas waarsku.
"Ek gaan van tien af terugtel, en as ek by een kom ..."

Asem in. Wat dan? Gaan hy die venster breek?

Ek weier om vir hom oop te maak. Ek draai om op my ander sy, loer na my foon op die bedkassie en besef ek moes die alarm in my slaap doodgedruk het. Nou kan ek maar vergeet van wegkom.

Die gehamer teen my venster word al hoe harder. Ek trek die duvet oor my kop, krul my bene onder my boude in en knyp my oë toe.

No one ever said it would be this hard, oh, take me back to the start ... Coldplay is saggies hoorbaar waar die oorfone langs my op die kussing lê. Dis dinge waaraan ek soms dink - om terug te gaan na 'n plek voor als begin skeefloop het. Na 'n plek toe ek nog kon voel, toe ek regtig nog mens was. Na 'n wêreld voor Shane en die drugs en die vretende pyn.

'n Ongewone sielkundige riller wat jou gaan laat wonder - wie's wie en wie's daar onder ... 

Goodreads 3.67